Ruitɩ 'pɛn 'de Boasɩ bɩ o
3
Naomi wlu' 'de Ruitɩ -pee, ʋ 'na: 'Ma "ju, -ta a 'jea -te, -wɛe a 'di 'jea wɔn nmɔ 'ma jiɛ i -pɔn 'a. 2 A juo 'nɛ, Boasɩ -ɔɔ dbo nʋ nynʋkpae' ke aa nʋa dbo, nɩɛ -aa dedi' -o. -Kwie" ka -sɩan a, ɔɔ muɛ ɔkɩ -kɩan' "jru i 'ʋn -fʋan' 'de ɔɔ' -kle' 'di. 3 A sɔn 'ʋn, a jre 'pepe, a po paifɛn, a 'je aa' dɩ 'dɔe 'ʋn paa-, -wɛe a 'je 'de ɔɔ' ɔkɩ bla 'ɩn mu. 'Kaa a 'bo aa' -cɛ" 'kwla -saa' 'de ɔ -pee mamaʋ, 'sʋ dɛdi 'a 'je -kwɛ. 4 -Bo ɔɔ sea i 'pɛan mu 'sʋ ɛ, a sie ɔɔ' 'pɛna "jriɛ o. -Bo a 'je 'e 'sʋ -mɛ a mu a 'je ɔɔ' bɩ tae' "jru i -sa -wɛe a 'je i 'pɛn 'de ɔ bɩ o. -Bo a nʋ kan' a, dɛ a 'jea nʋɛ, ɔɔ' -cɛ" 'kpa a muɛ aʋn 'tmʋa.5 'Sʋ Ruitɩ 'na: Dɩ "klein a -sia" 'nynɩ ɛ, 'ma muɩ -wee' nʋa'.
6 Ruitɩ mu 'de Boasɩ 'a ɔkɩ bla 'ɩn 'mɛ -cɛɛn'-, -wɛe ka ʋa' kʋan de -sia" 'nynɩ ʋ nʋ kan'.
7 Boasɩ di' ɔ je 'na -cɛɛn'-, 'sʋ ɔ 'di je wɔn nmɔ. Ɔ nɩa 'e -paii 'sʋ ɛ, ɔ muɛ 'pɛna kpʋan' 'de ɔlɩsɩ 'a sro" -pʋn". Ɔ 'kpa "nyɩɔ' 'sʋ ɛ, Ruitɩ ji' wɔɔ-, -wɛe ʋ -sa ɔɔ' bɩ tae' "jrui, 'de ʋ 'pɛn i 'de ɔ bɩ o.
8 -Too' -kwɛa 'sʋ, sɩaɩn'- kpʋn Boasɩ 'mɛ, ɔ "bia i 'sʋ -mɛ 'nynɔkpao due' 'pɛn i 'de ɔ bɩ o.
9 'De ɔ -tee' ʋ i, ɔ 'na: Ɛ nyɔ -o ɛ-?
Ʋ 'na ɛ 'mɔ -ma dbo nʋ nynɔkpao' Ruitɩ -o. -Ɩn -duo" 'ʋn -wɛe 'ma -tɩ' 'je 'de -ʋn "jru nɩ-, dɛ-nʋɛ' nyʋ -aa -tɩ' nɩa 'e "jru ɛ, -ɩn -nɩɛ ʋʋpʋ 'a due' -o.
10 'Bomɔ Boasɩ wluu Ruitɩ -pee, ɔ 'na: 'Ma "ju, Nyɔsoa 'a "diwan kpʋn aʋn. Aa' kʋan de 'a -tɩ' kmaa' -jɛ -nɩa -sɩan -ta -mɛ -sii -jɛ -nɩa tɛin" 'mɛ, dɛ-nʋɛ' -koa" mɩɩ", ʋʋa' -jʋ -blea dɛ o, -jʋ -sea dɛ 'ble o, a se 'e -mʋ 'de bla.
11 Kaan ka 'ja a, 'ma "ju, aa' pɛe 'bo i pleɛ. Dɩ "klein a -teea' i ɛ, 'ma muɩ nʋa', dɛ-nʋɛ' ka a nɩa 'nynɔkpao -cɔɔn'- ɛ, -kwlɔ -nɩa -ta -wee' "klein juɩ'. 12 Wlu a 'tmʋa ɛ nɩɛ tɔ' -o -mɔ, nyʋ aoa' -tɩ' nɩa 'e "jru ɛ, 'ɩn nɩɛ ʋʋa' due' -o -cɛɛn'-. 'Kaa "ju jrɔ' -nɩ 'e, -ɔ -ke aoa' 'wlʋa "kʋʋan i ɛ je 'ʋn -sii.
13 A 'pɛn i 'mʋa-, -sɔn' 'je -sɩn'. -Bo ɔ nɩɛ "i -klae" pɛɛn -klae" -wɛe aoa' -tɩ' 'je 'e ɔ "jru nɩ ɛ, -aa mʋɛ 'jea. -Bo ɔ wɔn ɛ, ɔ nʋɛ, -bo ɔ se 'wɔn ɛ, 'ma 'tmʋɛ 'bo Nyɔsoa "juɛi, -mɛ 'mɔ aa' -tɩ' a mu 'e "jru nɩa'. A nʋ aa' "maʋ wɩ -nɩ 'mʋa- -sɔn' 'je -sɩn'.
14 'De ɔ bɩ o 'mʋa- 'bomɔ Ruitɩ 'pɛn. 'Kaa -sɔn' wɔn "i 'sʋ ʋ sɔn 'ʋn 'ɛ, -mɛ nyɔ 'ɔ juuo ba "i. Dɛ-nʋɛ' Boasɩ 'na: Ka 'nynɔkpao jia -ta dɩ bla 'ɩn ɛ, nyɔjrɔ' 'bo ɛ juuɛ.
15 Ruitɩ 'wɔan mu -tɩ ɛ, ɔ 'na:
A sro aa' "bai klaa", a kpʋn ɛɛ' wɔn i ka -cɔɔ'- ka.
'Kamɔ ʋ nʋ -cɛɛn'-, -wɛe ɔ dbaa ɔkɩ 'a 'tiin due' ɔ poɛ 'e ʋa' "bai klaa" -nɛ 'di -wɛe ɔ po ʋ sʋn o 'de ʋ -teɛ "jru, 'sʋ ʋ muɛ -kwlɔ de.
16 Ʋ nyni a 'de ʋa' kʋan de "wɔin 'sʋ ɛ, ʋa' kʋan de -tee ɛ ʋ i, ʋ 'na: -Aa' 'wɔn 'e, 'ma "ju?
-Wɛe dɩ "klein "ju -nɔ nʋa Ruitɩ "jri i ɛ, ʋ po ɩa' "kuan. 17 Ʋ -te' ɛ wlu "kpei, ʋ 'na: Ɔ "nyɩ 'ʋn ɔkɩ 'a 'tiin due', ɔ 'na 'ɩn 'bo kwa flɔn ɛ -wɛe 'ɩn 'bo 'ma kuan de jee ɛ.
18 'De Naomi 'na: 'Ma "ju, kaan ka la, a -te 'tɩɩn mamaʋ 'sʋ -ta ɩa' -tɩ' tu 'jea "jrui po ɛ, a 'je 'e 'je. Dɛ-nʋɛ' -bo "ju -nɔ se -tɩ' -nɩ ja -kwɛ' 'de -sɩan wɩ 'di ɛ, ɔ se -tɩɩn kpʋn i see.